نائب عمدة طنجة غيلان … قال الملك يستفز الأحزاب… وخرج كيشرح بلي ماشي غلط … طبعا ماشي غلط أسي غيلان راها إساءة … حيت لي كيخطئ مع المؤسسة الملكية وكيخرج خرجات فوضوية … ويستغل غياب العمدة .. باش يجلس فكرسي الجماعة كأنه عمدة … ويعطي الدروس ويرد على الخصوم السياسيين … وكأنه يمثل الليموري فراه خطأ … فإذا كان الليموري كيعمل مستشارين ينبهوه ويهزو الدقة عليه … فراه نتا جمعتي كلشي حب وتبن … السياسة ماشي قاعة دروس باش تشرح المصطلحات بعد الوقوع في الخطأ… الخطاب الملكي واضح ما محتاج تأويلات فوضوية… غيلان ما قالش جلالة الملك ولا صاحب الجلالة … باش نقولو فعلا خطاب هرمي ولا أفقي ولا عمودي ومكعب ..… قال بجفاف “الملك يستفز”… هادي إساءة شكلًا ومضمونًا ولو تعملت بحسن نية… والنية ماشي عذر… الكارثة فناس كيحسبو راسهم فاهمين وكيطيحو فالهوى ديالهم بسبب جملة وحدة… الناس اللي نصحوه ما بغاش يسمعلم … حيت هو لي عارف معجم المعاني .. وحيت هو الوحيد لي كرشو ما فيها عجينة … باغي الخير والرضى وخا كلشي تفرج فيفلم الماضي لا يموت … خرج علينا ففيديو كلو تقطيعات كيشرح الفرق بين الاستفزاز الإيجابي والسلبي… نسا بلي الخطاب الملكي مؤسسة دستورية برسائل استراتيجية… الملك كينبه ويوجه ويحاسب… وأنت دورك كمنتخب محلي .. نائب أول للعمدة … الإصغاء والتفاعل ماشي التأويل الفوضوي… الأخطر أنه بغا يكلها عماها … ملي قال “نحن قلنا وكتبنا”… شكون “نحن”؟ حزب الأحرار؟ الجماعة لي جالس فكرسيها وتعتبر ممثلا لها فداك الحوار ؟ الشباب؟… الكلام بلسان الجماعة يعطي للخطأ بعد جماعي… والكلام المفرد على الملك يعطي بعد عدائي… تموقع تواصلي خطير كيكشف خلل المنتخبين… لبس لباس أنيق بالسعودية فلقاء وبطنجة خلال تحية العلم احتفالا بعيد العرش لبس لباس عادي… ازدواجية فالتقدير… وخى قالك هو كيفهم المعاني والسياق … قسم منتقديه بين متفهم وحاقد ومتحامل… لكنه اختار يلوم الناس ماشي نفسه… كيعطي الكرة سخونة لخصومو السياسيين وبغاوهم يتفرجو فيها .… باقي كيلعب دور الضحية ويبحث عن مؤامرة… الحقيقة خرج على السكة ومع كل رد ما كيزيد غير يبعد… السياسة ماشي لعبة والسيادة ماشي نص شعري… السياسي اللي كيطيح فالتأويلات ما جاهزش يكون فالمؤسسات… الخطاب الملكي واضح واللي فهم فهم… واللي معندوش حس الدولة ما عندو ما يدير فالتسيير… وقال بلي طبق تعليمات الملك فجلب الشباب… لكن ما عطاهم حتى سلطة ولا منصب في الجماعة … جابهم باش يعمروا اللائحة ويعطيو صورة زوينة… و احتكر النيابة الأولى للعمدة … واش هادي تعليمات الملك ولا فن استغلال الفرص ؟… التمكين الحقيقي هو سلطة ومسؤولية وحق الغلط والتعلم… والاعتراف بالخطأ ماشي التمادي والعناد … عمل مسرحية ورسملها الأدوار … السياسة مواقف ومصداقية… ماشي كلام فارغ ولا مراوغات… والمصداقية أفعال تحترم الناس… السياسة مسؤولية وتحدي… الشعب ما كيصدقش الوعود الفارغة… الخطاب الملكي مرجعية وطنية…و السياسة كتحتاج رجال شجعان كيعترفوا بالأخطاء ويصلحوها… لا لعب أدوار قدام الكاميرا… الشباب اللي باغي التغيير خاصو يكون فمراكز القرار… فحال الاتحاد الدستوري عمل شاب فنيابة العمدة … التغيير الحقيقي يبدأ من الفعل والمشاركة… النوايا ما كافياش بلا فعل صادق… والناس مابقاوش كيصدقو الكلام الفارغ… الملك رمز الدولة والوحدة والكرامة… السياسة أمانة ومسؤولية وحق الشعب علينا نخدموه بصدق وجدية… هادي الحقيقة باش نبنيو مستقبل أفضل… السياسة مواقف وأفعال… مشي كلمات رنانة ونعطيوها التبرير
