بزاف ديال المواطنين ومستعملي الطريق كيتشكاو من الفوضى اللي ولى كيعرفها باركينگ شارع مكسيك بمدينة طنجة، بعدما ولى كيتستغل بطريقة عشوائية وبدون احترام للضوابط والشروط القانونية، الشي اللي تسبب فعرقلة حركة السير والجولان وخلق اختناقات مرورية بشكل متكرر.
وحسب عدد من المواطنين، فهاد الوضع ولى كيأثر بشكل مباشر على السائقين والمارة، خصوصاً فالأوقات اللي كتعرف فيها المنطقة حركة كبيرة، حيث كيولي المرور صعيب وكيتزاد الازدحام بشكل ملحوظ.
وطالب عدد من المتضررين السلطات المحلية والجهات المعنية بالتدخل العاجل من أجل تنظيم هاد المرفق، ومراقبة مدى احترام القوانين المعمول بها، واتخاذ الإجراءات اللازمة باش ترجع حركة السير لطبيعتها ويتحافظ على النظام العام وسلامة المواطنين.
وكيأكد المواطنون أن التدخل السريع غادي يساهم فالحد من هاد الفوضى اليومية اللي ولات كتقلق الساكنة ومستعملي الطريق، خاصة وأن شارع مكسيك كيعرف حركة دائمة طيلة اليوم.